Çin lideri Si Cinpinin iki gün öncə Rusiyaya baş tutan qeyri-rəsmi səfəri hələ də dünyanın aparıcı əsas media orqanlarının əsas müzakirə mövzularındandır. Si Cinpinin gözlənilmədən Kremldə görünməsi təsadüfi ola bilməzdi, səfərin hansı məqsəd daşıdığına dair isə müxtəlif fərziyyələr eşidilməkdədir.

Bir sıra siyasi anlitiklər Çin liderinin Ukrayna müharibəsində Putinə açıq dəstək verəcəyindən narahatlıq ifadə etsə də, baş verənlər bu ehtimalın inandırıcılıq əmsalını azaldır.

Kremldə 4,5 saat davam edən görüşdə Si Cinpinin Putinlə əsasən Ukrayna mövzusunda dialoq qurduğu aydındır. Tərəflərin səfərdən sonrakı ilkin açıqlamaları isə Çin liderinin Ukrayna mövzusunda Putinlə önəmli razılaşma əldə etdiyini düşünmək üçün əsaslar yaradır. Görünən osur ki, Si Çinpin Putini “Ukrayna bataqlığı”ndan çıxarmaq üçün Kreml sahibinə konkret sülh şərtləri təqdim edib. Səfərdən dərhal sonra Putinin özünün və Rusiya rəsmilərinin verdikləri açıqlamalar da daxili və beynəlxalq ictimai rəyi həmin “sülh şərtləri”nə hazırlamaq məqsədi daşıyır.  

Bu baxımdan ÇXR sədri Si Cinpin görüşdən sonra verdiyi açıqlama diqqət cəlb edir: “Çin Ukraynadakı münaqişənin həlli üzrə sülh və dialoqun tərəfdarıdır” 

Rusiya Prezidenti Vladimir Putin isə öz növbəsində bildirib ki, Çinin Ukrayna ilə bağlı planı sülh nizamlanması üçün əsas ola bilər.

İctimai rəyi “sülhə hazırlamaq” məqsədilə verilmiş ən açıq mesaj isə Rusiyanın Müdafiə naziri Sergey Şoyquya məxsusdur. Belə ki, Ukraynadakı müharibənin perspektivlərindən danışan Şoyqu “istənilən müharibə sülhlə başa çatır” cümləsini qurub. Bununla belə, rusiyalı nazir müharibənin nə zaman başa çatacağı ilə bağlı suala cavab verməyib.

Təhlillər göstərir ki, Si Cinpin Putini başqa yolu qalmadığına inandıra bilib.  Ağlabatan versiyalardan biri isə odur ki, Çin lideri Putinlə danışıqları ABŞ-ın və Qərbin razılığı ilə həyata keçirir. Nəzərdə tutulan sülh sazişinin hansı şərtlərlə reallaşacağı ilə bağlı detallar isə yaxın günlərdə bəlli olacaq./savash.org/