Jurnalist Məhəmmədəli Qəribli deputat Elşən Musayevin parlamentdəki son çıxışını tənqid edib.

44Gun.Az xəbər verir ki, jurnalist adıçəkilən millət vəkilinin deputat Vahid Əhmədovla bağlı çıxışının əvvəlcədən hazırladığını iddia edib:

"Deputat Vahid Əhmədovun Milli Məclisdə necə “çarmıxa” çəkildiyini yəqin ki, hamınız izlədiniz. Həmin müzakirələrdə mənim diqqətimi millət vəkili Elşən Musayevin emosional tərzdə etdiyi çıxış çəkdi. Çıxışın məzmunu ilə bağlı heç nə demək istəmirəm. Ancaq Elşən Musayev Vahid Əhmədov haqda etdiyi məlum çıxışla prosesə başqa bir görkəm vermiş oldu. Nədir bu yanlışlıq? Fikir verdinizsə, Musayev öz deputat  həmkarı Vahid Əhmədova ünvanladığı ittihamları əvvəlcədən hazırlanmış kağızdan oxuyurdu. Vahid Əhmədovun Musayevin çıxışından əvvəl səsləndirdiyi arqumenti bu oldu ki, ona qarşı bu kampaniya təşkil edilib. Etiraz edən deputatların çıxışının məzmunundan isə belə başa düşdük ki, onların Vahid Əhmədovun səsləndirdiyi fikirlərə reaksiyaları təşkil edilmiş yox, impulsivdir. Çünki deputat müsahibəsində hədəf olaraq məhz onları və ümumi parlamenti seçib.

Maraqlıdır, elə qısa zaman kəsiyində  deputat Elşən Musayev Vahid Əhmədova həsr etdiyi monoloqu harada və necə yaza bildi ki, sonra da onu üzündən oxumalı oldu? Mətn əvvəlcədən  cibində olubsa, onda sual yaranır: nə bilib ki, iclasda məhz Vahid Əhmədovla bağlı müzakirə gedəcək? Axı, əvvəlcədən müəyyənləşən gündəlikdə bu məsələ olmayıb. Lap götürək ki, bilib. Məgər o qədər mətni oxuyub əzbərləmək belə çətindir ki,  bunu etməməklə Vahid Əhmədovun arqumentini gücləndirmiş olur? Görünür ki, Vahid Əhmədovun müsahibəsində dərin məna Elşən Musayevə tam çatmayıb. Belə olmasaydı, o, Əhmədova olan qəzəbini kağızı üzündən oxumaqla deyil, ürəkdən ifadə edərdi".

Xatırladaq ki, bir neçə gün öncə bəzi deputatlar Vahid Əhmədovu bloqer Mehman Hüseynova verdiyi müsahibəyə görə sərt tənqid edib. Milli Məclisin spikeri Sahibə Qafarova isə bildirib ki, məsələyə İntizam Komissiyasında baxılacaq.