Azərbaycanda avtomobillərin idarə edilməsi üçün etibarnamənin zəruriliyi tələbi aradan qaldırıla bilər. Bu barədə Konstitusiya Məhkəməsi tərəfindən nəqliyyat vasitəsinin mülkiyyətçisi olmayan şəxsin nəqliyyat vasitəsini idarə etməsi üçün etibarnamənin zəruriliyi tələbinin müvafiq qanunvericilikdə aradan qaldırılması Milli Məclisə tövsiyə olunub. 

Mövzu ilə bağlı millət vəkili Musa Quliyev öz fikirlərini bölüşüb.

“Bu qərar vətəndaşların işini bir mənada asanlaşdırır. Bir şəxsin avtomobilini başqa biri sürürsə və ya hansısa tanıdğına etibar edirsə, hansısa bir xüsusi prosedura ehtiyac olmamalıdır. Digər tərəfdən, artıq elektron hökümət çərçivəsində maşınlar və avtomobil sahibləri haqqında olan məlumatlar demək olar ki, bazada var. Əlbəttə, əvvəlki vaxtlarda etibarnamə maşınların qaçırılmasının, oğurlanmasının qarşısının alınması baxımından önəmli idi. İndiki vaxtda nəzarət sistemləri, radarlar yetərincə var. Məncə artıq etibarnamədən istifadəyə ehtiyac yoxdur”.

Hüquqşünas Elşad İsayev bu qaydanın qonşu Gürcüstanda artıq uzun müddətdir tətbiq olunduğunu qeyd edib.

“Bu dəyişiklik qonşu Gürcüstanda tətbiq olunur. Əgər sistemdə şəxsin sürücülük vəsiqəsi varsa, nəqliyyat vasitəsinin pasportu (texpasport) maşında olmaq şərti ilə, idarə oluna bilər. Çox güman ki, elə qonşu Gürcüstanda tətbiq olunan qanunun bənzəri ölkəmizdə də tətbiq olunacaq”.